Donya Aneuk Miët

Donya Aneuk Miët

keunarang
Dian Rubianty

       Lagèe biasa, tiëp seupôt lheuh jak beut bak Teungku Imum, aneuk miët gadôh dimeuén bola bak lapangan disampéng meunasah. Polém, sabab hana niët geumeujak saho, lheuh geu tulông Teungku peubëut aneuk miët, teuduëk bak seuramoë meunasah. Hayëu keudéh geu kalôn aneuk miët meu pluëng-pluëng dipeulét bola.
       Teungôh hayëu-hayëu jih awaknyan dimaèn bola, tiba-tiba mandum meusapat bak teungôh lapangan. Dari jeuôh teudengo bak Polém sang na yang meupaké. Polém bagah-bagah geupluëng u lapangan.
       “Hai…pakon ka karu teungôh ka meuén gèt-gèt?” teugah Polém sirap geu peusiblah aneuk miët nyan. Rupa jih si Hakim ngon si Uma yang meu paké.
       “Peu pasai ka meu paké?’ tanyong Polém watèe aneuk miët nyan ka seungap.
       “Si Hakim yang peu phôn…”
       “Jéh ka dipeusalah lôn… kah yang awai mita salah…”
       Sigohlom aneuk miët dua nyan meuseu’ot sambông lom, bagah-bagah Polém geumè awaknyan bandua u meunasah.
       “Nyo peugah haba sidroë-droë, maséng-maséng na masa bela droë,” kheun Polém watèe awaknyan man lhèe ka troh u seuramoë meunasah.
       “Hakim, drou keuh phôn…”
       “Si Uma ka off-set. Lôn peugah hanjeut sipak lé bola tapi disipak chit lam gawang kamoë.”
       “Beutoi nyan Uma?”
       “Beutoi, Bang. Tapi panéna meu cèh off-set saré. Nyo kôn meuén pura-pura. Si Hakim jih leu
that meu atô. Hana hayëu…. Man lôn peugah meunyo leu that dibôh atô, singoh-ngoh bèk asi lé jih meuén ngon awak kamoë. Jih kôn awak Meunasah Atëung blah dèh. Keupeu peurôh-rôh droë ngon kamoë. Meunyo hana galak lagèe kamoë bôh atô…” Maken bak ujong su si Uma maken rayeuk. Sampo’an Tengku Imeum geu teubiët dari kantô di sampéng seuramoë seumayang.
       Hakim teuduëk meuteukui. Sang teupeh hatéjih karena peu yang dikheun kheuneulheuh le si Uma.
       “Uma, pakon jeut raya su meunan, neuk?” leupie teudengo su Tengkue Imeum.
       “Meunyo bak pasai meureuno, hana aneuk ateung blah deh, aneuk blah no, neuk. So mantong jeut jak bak meunasah nyo, karna meunasah nyo Allah Po.”
       “Lôn hana makesud teu’ôh nyan Tengkue, meunyo si Hakim hana leu diboh atô bak meuén bola.” Uma sang mantong palak keu si Hakim. Tapi su jih hana emosi lé.
       “Meuén bola kon keu peugadoh kuerawat badan, bek sampo sabab nyan malah meupaké. Cie piké, kon hana jröh sagai sabab buët ubit, ta meu paké saré keudroë-droë?”
        Dua Aneuk miët nyan seungap lam pikeran droë maséng-maséng.
       “Meumat jaro teuma, lheuh nyan jak cok ie seumayang ta seumayang Meugreb,” kheun Tengku teuma.
       Aneuk miët dua nyan dimeumat jaro lheuh nyan dibeudoh dijak tron u yub jak tueng ie seumayang. Lheuh seumayang Meugreb Polém dijak wo u rumoh. Liwat rumoh si Jol bagah-bagah dipaléng muka. Mantông teuingat that lam haté Polém, kiban baro sa si Jol diteugah Polém bak teungoh-teungoh kawan ramè. Gèt that malè Polém watèe nyan dipeulaku lé si Jol lagèe aneuk manyak.


***

       Seupot singoh jih, Polém liwat lapangan bola meujak u meunasah. Niet lam haté meujak seumayang Meugreb ngon aneuk miët. Buno jih gabuëk ditulông Ayah, hana meuteumèe tulông Tengkue peubeut aneuk miët.
       Lam lapangan dikalôn si Hakim ngon si Uma teungoh meubagi-bagi bola. Gèt that si Hakim jok bola sampo si Uma jeut disipak bola dilop gol lam gawang lawan. Awaknyan dua dimeusurak, dimeuëm-uëm ka meunang meuèn bola.
       Sira geucok ie semahyang, Polém geutanyong keu gura-gura bak si Uma.
       “Uma, hana bungeh le droë keuh ngon si Hakim?”
       “Nyan kon baro, Bang.”seuôt Uma. Jaro jih sibôk ditôp kran ie.
       “Nyo uronyo kamoë meupake, han meunang lage buno Bang.” sambông Hakim tiba-tiba ka trôh dilikôt Polém.
       Polém teu iëm dikalôn aneuk miët duanyan meuwa-wa di ék u ateuh meunasah. Sang baro hana kejadian sapëu. Padahai Polém diteupeu that, Hakim teupeh haté ngon narit si Uma baro.
       Ban meujak ék u meunasah, dideungô su si Jol geuheui nan geuh.
       “Polém, keuno neu jak, siblah lôn mantong na pat dong.”
       Polém teujak teudong. Haté jih mantong saket. Tapi nyo ditulak dong dibineh si Jol, peu alasan jih. Peulom nyan pat shaf nyan mantong na pat dong.
       Sipanyang seumayang, Polém hana khusyu’. Pikeran jih dijak lèh ho ho. Lheuh seumayang dimeujak laju tapi si Jol dithëun jaro jih.
       “Polém, nyo droë na watèe lôn keumëu peugah haba siat.”
       Lagèe biasa si Jol ditanyông pakiban pikiran Polém. Kali nyoë pasai Mulôd Nabi urô Aleuhad ukeu. Polém diseuôt ala kada mantông. Hana meuseumangat lagèe biasa.
       Lheuh si Jol peugah hai jih, Polém teugrak haté keumëu tanyông pasai yang peugèt haté jih teupeh baro nyan lam rapat majeulieh meunasah.
       “Jol, jino lôn keumeng peugah hai lôn bak droëkeuh. Sibena jih lôn hana keumeu peugah haba ngon droë. Tapi nyo ka lhee uro. Teungkue peugah, hanjeut tayô saré-saré urëung muslim leubèh lhèe uro hana tapeugah haba.”
       Muka si Jol deuh hireun. Lam haté dicuba kirakira peu meukeusud Polém.
       “Lôn teupeh haté ngon droë lam rapat Mulod baro nyan. Neu teugah lôn lam kawan ramé.” Ah! Lapang rasa jih dada Polém lheuh dipeutroh meukeusud jih. Jikalôn muka si Jol meuubah hana mangat.
       “Polém, lôn lake meu’ah bak rayeuk that. Nyo rupa jih yang peugèt droëneuh hana lé narit ngon lôn lheuh rapat nyan. Lôn piké musabab droëneuh sibok.” Si Jol dinyhueng jaro.
       Polém hana dibalah meumat jaro si Jol, sampo akhe jih si Jol dipeutreun teuma jaro jih.
       “Lôn keubiet hana meukeusud peumalèe droë neuh. Hana mungkén lah lôn lagèe nyan. Tanyo kon ngon seujak manyak. Peu na masaalah sabé lôn lakèe tulông bak droë neuh. Meunyo kon droë yang dukong dilikot lôn, pané na aneuk muda gampong dipilèh lôn jeut keu ketua peunguroh meunasah nyo.”
       “Si go teuk lôn lake meu’ah, Polém. Hana peu-peu meunyo droë hana jeut neu peu me’ah lôn lom. Lôn teurimong salah, ka silap rôh rheut su keu droë lam teungôh kawan ramé. Watèe nyan lôn agak meukarat. Buet leupah leu, tapi mandum aneuk muda hana peureumëuen.”
       Dikalôn Polém teu iëm, Jol disambong lompeugah haba.
       “Lôn agak gugôp ngon acara go nyo. Mulod go nyo gampông tanyo geu undang siplôh bôh dayah ngon mandum aneuk yatim lingka gampông tanyo. Sang lôn harôih peugèt rapat lom, seubab droë meutu’oh lôn jeut tingat, lôn kon cuma rayeuk su ngon droë mantong, tapi rap ngon mandum rakan-rakan geutanyo yang ikôt rapat. Pasti mandum jino ka sakèt haté keu lôn.”
       Polém dikalôn si Jol di palèng muka u sampèng meunasah. Dari klap-klip lampu bak jalan deuh bak pineung sipanyang jalan diapit-apit lé angèn.
       “Teunang mantong, yang laèn hana dipeugah sapeu pasai rapat nyan. Cuma lôn mantong yang lage aneuk mit, droë kon peugah haba lam rapat sibagai ketua, kon sebagai Jol yang rakan ulôn. Hana sipatôt jih lôn lakèe neupeutimang khusuih dari droë keuh.”
       Si Jol dijok jaro teuma, go nyo Polém geusambôt bagah-bagah. Nyan awaknyan dua teukhem-khem teuma.
       “Adak droë peugah laju bak lôn lheuh rapat nyan, kon hana peureulèe lôn lhèe uro mumang hana ngon peugah haba,” kheun si Jol watèe awaknyan teungoh meulangkah meujak wo.
       “Droë turi Hakim ngon Uma kon? Meunyo kon karna awaknyan, mungken sampo an thon ukeu lôn hana peugah haba ngon droë neuh.”
       “Peu rhôh pasai Uma ngon si Hakim ngon pasai geutanyo?”
       “Lôn malèe haté ngon aneuk miët dua nyan, baro dimeulho uronyô ka meu wa—wa teuma.”
       “Tanyo yoh jameun kon meunan ciet Polém, na teutingat droë watèe ta meuén bola, lôn sipak bola bukah kaca kanto Tengkue? Karna takot, nyan ku peusalah kah. Tapi oh seupot singoh ka ta beut sama teuma kon….”
       Polém ngon si Jol teu khem-khem teuingat cerita awaknyan jameun dilèe. Ah! Leupah indah donya jih watèe mantong aneuk mit! Seubab watèe nyan jih jeut dimeuruno peu mantong, hana male meunyo salah. Bak masa nyan, Polém hanjeut diteumaki, sabé dipeugah yang seubeuna. Watèe Polém mantong aneuk mit, pakiban lam haté meunan lam narit. Lagèe urëung syiek kheun, pakiban crah meunan beukah. Watèe Polém
mantong aneuk miët, leupah mudah dipeume’ah urëung yang salah. Haté sabé lapang, donya nyo sabé peunoh keunangan.
       Masa jino, deungon meubago-bago alasan, leu yang ka meuubah! Ah! Polém harôih meureuno teuma dari donya aneuk miët. Khusoih jih bak pasai peumeu’ah salah ureung laén dan meurayeuk-rayeuk haté.


(Dian Rubianty, tinggai di NY)

Read More

Sya’ban 1412 H

Sya’ban 1412 H

Keunarang: Nyakwa Ty

       Ka bulat meukeusud Yasmin jak seutot Umi woë u gampông singoh. Nyoë kon watèe pré kuliah, Umi pih hana geulakèe jak intat. “Ka tréb that lôn hana lôn woë Mi, hawa lôn jak sigo nyoë” meunan jimeudalèh bak Umi. Han ék jitheun lé keu saboh masa’alah nyang seun-seun sigo muputa lam ulèe. Jimita ilah pakriban cara beugèt glah masa’alah nyan. Jikeuneuk jôk pulang taloëtakue nyan.

***
       Ban trôk awaknyan bak pageue ka kirôh si Kilat. Bagah that jiteupeue na ureueng trôk, rasi that jih geubôh nan nyan. Asèe ngon mie di rumoh Nèk bandum geupeunan si Kilat. Awai nyang ka maté saban cit nanjih. Bungong kômkômma mirah muda ngon putéh mubanja di leuen rumoh, sang hantom piôh jimubungong. Sabé jipumeulia jamèe tamong atawa teubiet. Bak meulu bak ulèe baréh, sikrèk sagai jimubungong.

       Rumoh raya nyan mantong lagèe biasa. Tuha ngon deuh gab, sang gèt that teupiléh kayèejih watèe geupeugèt jameuen, lom pih hana geupeujeuet-peujeuet bak geupeulaku kayèe. Ladôm teumpat geubôh kayèe meu-uké, pah bandum ngon wareuna asai kayèe. Na sidroë aneuk miet meugantung lam hayôn di yub rumoh, jijaga lé kakjih, jiduek bak rangkang toë tamèh. Mandua aneuk nyan cuco Téhcut, awak toë rumoh nyang sabé jak peungon Nyakwa.

       Nyakwa Atikah seunang that até ka trôk jamèe di Banda Aceh. Ban saboh rumoh geuyue peugléh bak Téhcut. Kasô ngon bantai geupeuteubiet nibak bungkôh keureutah peulaseutik. Bieng ngon udeueng raya geupeusan laju bak Apa Raman sidéh di neuheun, eungkôt rambeue meunyo na bak bang Taléb di pasi. Manok dara ka geuniet meusie lam dua uroë nyoë. Tréb-tréb sigo na geuwoë adék ngon aneuek keumuen geuh.

       Ban lhèe awaknyan geu-éh bak jurèe wie watèe malam. Téhcut jéh pat di seuramoë likôt. Seupôt that cit rumoh Nèk nyoë ‘oh malam. Alèh pajan keuh ék ditamong léseutrék u gampông nyoë. Beuthat pih meunan hana masa’alah sagai keu Nyakwa ngon Umi. Trôk ‘an jula mantong cit mandua awaknyan geumarit-marit.

       Bak malam keudua di gampông, jula malam beudoh Nyak Yasmin ngon panyot bak jaroë, jitrôn u dapu. Jijak tueng ie seumayang bak mon di binèh dapu. Jipeuceubeueh droëjih trôn keunan. Bak ramoë likôt na cit lueng ubit keu teumpat tueng ie seumayang ‘oh malam, ie pih ka geuseudia. Teuma hana mangat atéjih jak cok wudhuk di sinan, alèh pih na soë-soë aneuk miet jak tôh ‘iek sinan jameuen.

       Téhcut ka mangat teungeut, lam seupôt nyan di seuramoë likôt Yasmin jiseumayang tahajjud. Jiistikharah keu singoh uroë, beu-ék gèt meusampé bandum niet meukeusud lam atéjih.

***
       Ku’uek manok ban saboh rumoh ka geujaga. Halôh teudeungo azan suboh di meunasah, dumna ék geutarék su lé ureueng mubang nyan. Mandua ureueng tuha nyan hana geujak ék u rumoh lé meungka uroë. Na balè cit sinan di rumoh dapu keu teumpat seumayang.

       Rupajih di Téhcut ka mulai geupeukap apui. Bèe bara bubeue mangat teurasa ban saboh dapu. Yasmin jibuka tingkab seuramoë ngon jurèe. Sijuek that jitamong hawa u dalam. Su cicém kirôh jipo-po lam lampôh nyan. Jipinah lé di bak pineung u bak jambèe bue. Alèh cit nyan nyang geupeugah beurujuek balèe, batéjih. Tupè meulumpat-lumpat di công bak saôh. Deuh blang luah that bak binèh jalan. Mantong beungoh that uroë, seungue that, goh lom na deuh ureueng jak u blang.

       Jikalon Nyakwa Atikah geubuka geurupôh manok. Meuhambô aneuk manok cut-cut teubiet u lua. Meucieb-cieb bak gaki Nyakwa. Yasmin jitrôn keunan. Siat ka habéh breueh ngon padé lam plôk Nyakwa. Lheueh nyan Yasmin jijak keudéh u lampôh timu di keue rumoh. Pageue bak geurundông ngon kawat meuduroë ban saboh lingka lampôh. Na cit pintô ubit blah nan. Yôh manyak kon Yasmin galak jilingkeue-lingkeue pintô pageue ubit nyan. Payah jitarék dilèe dua plah trieng panyang keu pasak pintô ‘oh jikeumeung teubiet tamong. Pah guruek pasak nyan, mangat bak jitulak-tarék.

       Matauroë ka jiteubiet, meukilat-kilat cahya bak ôn u. Go nyoë Yasmin hana jiteubiet, jidong mantong di keue pintô. Jipeutimang lom sigo teuk keu nietjih uroë nyoë. Peue keuh ka beutôi niet lôn nyoë? Ho lôn mita Alhuda? Peue keuh jih mantong na bak alamat sot? Pakriban miseue hana meurumpok? Adak meurumpok pih, ék teujeuet lôn jôk pulang taloëtakue nyan? Pakiban meunyo jih ka tuwo hana teuingat sapeue lé keunan? Teuingat Yasmin keu istikharahjih beuklam. Peue na gèt kong niet lôn ‘oh lheueh istikharah nyan? Hana meunyum sapeue jirasa.

       “Nyak, ka pèt boh limèng ngon campli ubit meudua boh lèh”su Umi di dapu. Yasmin jitamong u dapu. Jicang boh limèng nyanngon bawang keu cicah keumamah nyang dang geukruet lé Umi. Jipéh boh sunti bacut ngon capli.

       “Mi, lôn keuneuk jak meu’èn siat uroë nyoë u Sigli, beh” jipeugah leugat.
       “Ho kajak, Nyak?” tanyong Nyakwa, “peue tahei si Wan bak keudè yu jak intat?”
       “Hana peue Nyakwa, sayang si Wan teungoh jimeukat, bahlé lôn jak keudroë” seu’ôt jih.
       “Bah hai Cupo, ka biasa dijih jijak-jak keudroë beuthat di Banda. Bah jijak kalon Sigli sigo” kheun Umi,  “man bèk jula that ka woë” geutamah keu Yasmin.
       “Meunyo meunan bagah teuk jak meukeumah, moto Cék Lah biasa poh lapan ka jiliwat bak keudè” kheun Nyakwa, gobnyan muphôm that keu masalah nyan beuthat jareueng that na geujak saho.

***
       Taloëtakue nyan kon meuh, kon pirak. Putéh mandum wareunajih, taloë ngon matajih. Beuthat imitasi, lagak that, meutumpôk bungong-bungong halôh bak mata peuet sagoë. Limong thôn ka likôt leubèh kureueng geujôk lé ngon jih Elya. Bak watèe nyan Alhuda, abang Elya, geujak beurangkat sikula u tanoh ‘Arab. Yasmin hantom jisôk kalông nyan. Jikeubah mantong lam plôkjih bak mari kaca. Lheueh nyan jih hana teuingat lé keu taloëtakue nyan. Meujan-jan mantong watèe jipeugléh mari na deuh lom kalông nyan.

       Sigo-go na trôh surat di ‘Arab, na tom cit awaknyan meurumpok siat watèe jiwoë u Banda Aceh. Had Uroë Raya nyang ka leupah, ka leubèh sithôn, Alhuda jak meu-uroë raya bak Yasmin. Yôh nyan jipeugah ka tamat sikula, na ngon jih peutaba buet bak dayah di Pidie, jih pih hawa jeuet keu gurèe. Laén nibak nyan jameuen kon cit galak jih keu meukat, kadang jeuet cit jibuka useuha di sinan euntreuk. Hana tréb ‘oh lheueh nyan Yasmin jiteurimong surat Alhuda di Pidie, nyan keuh keuneulheueh haba nibakjih.

       Kira-kira dua buleuen ka leupah, hana jitukon jimeulumpoë keu kalông nyan. Rasa-rasajih kalông nyan na jisôk sabé, teuma leubèh ubit. Mata kalông nyan kaca, ngon wareuna kunèng kunyèt. Teungoh jingui, kalông meu-ubah jeuet keu biru, ka rayek lom seunipatjih lagèe sot. Watèe biru nyan keuh, kalông nyan gadoh bak takue Yasmin.

       Yasmin han ék jipatéh that keu lumpoë. Teuma meujan-jan teuingat lé keunan, peu meukeusud lumpoë nyan? Teupiké jikeuneuk jôk mantong taloëtakue keu ngon jih, han rôh cit, hana sampé atéjih. Lom pih lheueh meulumpoë nyan kayém teuingat jih keu Alhuda. Pakon hana haba lé sagai seulawét nyoë? ‘Oh dudoë teupiké teuk jikeuneuk jôk pulang kalông nyan meungna langkah keudéh u Pidie sira jijak saweue sigo. Hantom nyang ka-ka na niet lagèe nyan lam atéjih, jak saweue ureueng agam, beuthat pih bak ngon sikula jih nyang toë sinan di Banda Aceh.

***
       Poh lapan labi-labi Cék Lah ka teudong bak keudè di leuen rumoh Nèk. Yasmin jicok teumpat duek di keue sabab moto mantong soh. Taloëtakue ka gèt teukeubah lam tahjih. Hana tréb jimaritmarit ngon Cék Lah, ka punoh moto. Cék Lah geujak beurangkat laju.

       Teupat that jalan nyan, mangat bak dijak moto beuthat na mubatèe bacut. Blang ngon lampôh dum sinaroë bak dua blah jalan. Hana that gèt jeuet padé bak darok nyan. Gampônggampông jeuôh deuh lam tumpôk bak kayèe. Yasmin hana piôh jieue gunong Seulawah sidéh bak binèh blang. Gèt that meusandéng dua Seulawah Agam ngon Inong leumah di jalan nyan. Seulawah Inong di keue, puncakjih bulat muplah bacut bak teungoh, nyang Agam tincu, leubèh manyang bacut teudong brat uneun di likôtjih. Teuingat Yasmin jikalon cit sabé di Banda Aceh, teuma Seulawah Agam mantong saboh nyang deuh di sidéh. Peuet blah kilo jarak u Sigli, lheueh nyan di Sigli jikeuneuk seumông lom peurjalananjih keudéh u Keumala.

***
       “Masih jauh dari sini?” tanyong Alhuda.
       “Tujuh kilo lagi kira-kira, masih jauh, saya pulang sendiri saja, itu ada labi-labi” seu’ôt Yasmin.
       “Mana ada jauh, saya sering kok ke daerah ini, ikut kawan ke neuheun”.

       Yasmin ji’iem droë, peue alèh geukheun lé Nyakwa ngon Umi eunteuk, ka jipuwoë teungku nyoë. Teuingat jih lom keu kalông, mantong na lam tahjih.

       Uroë tarék that, poh seuteungoh duablah. Na krueng rayek sinan blah uneun jalan, bak trieng meuriti sipanyang binèh krueng, bubayangjih rhot bak jalan, gèt that meu-uké ôn tincu-tincu nyan, teudôh teurasa lam moto pikap Alhuda. Ngon moto nyan keuh jipeugah jijak meuneukat keudéh keunoë ‘oh lapang watèe bak dayah.

       “Itu rumahnya, di pagar yang ada orang keluar itu” kheun Yasmin.
       “Mana?” le that bak kayèe rumoh Nèk, hana teujalok gob na rumoh sinan, meukon ka rab that, “wah, luas sekali, ya?” jikheun lom dudoë.
       “Assalamu’alaikum” rôh meusigo saleuem mandua bak pintô dapu nyang teuhah nyan.
       “Alaikumsalam, neutamong” seu’ôt Nyakwa. Mangat that teurasa di dalam rumoh, awak nyan geuduek piôh hèk bak rangkang dapu. Umi teungoh geupatè beulacan, gobnyan ka gèt meuturi ngon Alhuda.
       “Ék u ateueh lèh, panè na meu’oh jamèe duek bak dapu” kheun Nyakwa ngon Umi, “ka leueng tika-tika Nyak, na sidéh meugulông di ramoë keue” geutamah lé Nyakwa.

        Awaknyan jijak ék rot reunyeun dapu. Yasmin ji-ék leugat, jiprèh Alhuda bak pintô seuramoë likôt. Alhuda tahe teudong bak teungoh reunyeun, jikalon u yub reunyeun bak tumpok boh saôh teuleueng sinan peunoh ateueh tika.

       “Le that boh suku lagoë Nyakwa?” tanyongjih.
       “Ban teupot hai aneuk, eunteuk meungna nyang masak jeuet taci rasa” seu’ôt Nyakwa.
       “Hati-hati kepalanya” kheun Yasmin.
       “Apa?” bacut teuk rab meukhok ulèejih ngon pintô reunyeun, cit ubit that pintô nyan. Meuhan ka meukhok lôn, sabé na nyang jipeuingat aneuk inong nyoë, pikéjih.

       Seungue that di ateueh rumoh, awaknyan ji-ék ateueh rambat, seupôt sabé sinan beuthat tarék uroë di lua. Trôk u seuramoë reunyeuen barô keuh trang, jeureujak beusoë teudong sipanyang bintéh keue, ditamong bandum cahya di lua, bah pih meunan diruy that sinan. Yasmin jileueng tika, bèe ôn seukèe mantong beuthat ka jameuen tika nyan, halôh geu-anyeuem lé aruah Nèk, meuwareuna-wareuni bak binèhjih. Alhuda ji-eue bintéh meu-uké, sira lam até jipiké keu Yasmin, sa that ngon nanjih bungong meulu nyoë.

       Siat ka trôk Nyakwa jak peungon jamèe, ija sawak gèt geungui lé Nyakwa keupumeulia jamée. Yasmin trôn u dapu jijak cok ie jéb, siat ka jibalék lom, jiba ngon idang peunoh boh saôh lam pingan.

       Awaknyan geumarit-marit, Alhuda meuri seunang that até, gèt that pah cit ka jimarit bahsa Acheh. Yasmin hantom jimarit lam bahsa Acheh awai kon ngon Alhuda atawa Elya, nyan keuh hayeu jirasa ban jiteupeu ka jeuet geuh jinoë.

       “Pat gampông droëneuh?” tanyong Nyakwa.
       “Lôn awak Tamieng, Nyakwa, sidéh di Kuala Simpang gampông lôn” kheun jih.
       Yasmin jisék boh saôh, meunan jibôh lam ceupé habéh laju lé Alhuda.

       “Nibak dum boh kayèe, boh suku nyoë keuh nyang lôn galak that, Nyakwa” kheun jih meu-ulang-ulang. Alèh pakon pih jipeugah boh suku kon boh saôh, piké Yasmin, teuma hana ék jiteumanyong. Lam até jimeusyukô cit jih galak keu saôh, mangat bak jisék, adak meuboh aneueh, ka paloë lôn nyoë.

       “Neupajôh teuk, nyan nyang na mudah bak kamoë sinoë” seu’ôt Nyakwa. Di leuen rumoh na lapan bak saôh raya, deuh bandum nibak teumpat awaknyan duek.
       “Bu ka masak, jak tapajôh bu ilèe, eungkôt peue nyang na” pakat Umi, ka teudong gobnyan bak pintô rambat.
       “Hana peue Mi, lôn han jeuet tréb, mantong na janji lom uroë nyoë” kheun Alhuda.
       “Beuthat, ék na ka jeuôh neujak keunoë sigo hana tamakeuen sinoë, jeuet neuwoë laju lheueh bu eunteuk, hana peue” kheunUmi.
       “Jak, jak, di dapu mantong tapajôh bu, bèk tréb that bak tamèe
keunoë” geupeugah lé Nyakwa.

       Awaknyan geupajôh bu bak mija di dapu. Seudeurhana makanan
geutaguen lé Umi, bah pih meunan meukeunong that bak ureueng
seumajôh.

       “Le jamèe jak saweue Umi beuno, hana seumpat mumaguen” kheun Nyakwa.
       “Lôn cit ka hawa that keu gulèe rampoë, lôn pèt laju bak lampôh Nyakwa” seu’ôt Umi.
       “Mangat that beulacan jih Mi” kheun Alhuda.
       “Keu’eung bacut sang, leupah bacut lôn bôh campli”.
       “Hana Mi, ka pah nyoë, séb keu’eungjih” seu’ôt Yasmin.

       Adan leuhô ka teudeungo, ‘oh lheueh bu Alhuda jiseumayang siat di seuramoë, lheueh nyan jilakèe idin laju jijak gisa.

***
       Ka sigo aleuhad Yasmin ngon Umi gisa u Banda Aceh. Le that buet kuliah payah jikarat lé Yasmin. Seupôt nyan jipiôh hèk siat lheueh jipubuet seumubuet kuliah. Teuingat jih keu keujadian di gampông baroësa, teuingat jih keu Alhuda. Galak that jih keu boh suku. Boh suku? Oh…, nyoë keuh ban teujalokjih, teuma yakin that ka Yasmin, jih keuh nyan boh suku nyang jimeukeusud lé Alhuda. Teuma pakon cit mantong hana mangat até lôn nyoë?

       “Kriiing…” su taloëpôn.
       “Elya?…Alhuda…?…Inna lillahi wa inna ilaihi raji’un” Yasmin hana jiteupeue peugèt lé. Leumoh dum badan ngon teu’ôtjih. Alhuda ka habéh umu. Sinan teulinteueng bak binèh blang. Luka ban saboh badanjih, han peue tanyong soë nyang peulaku. Ajai ka trôh had ateuehjih. Ya Allah, Neupeutamong aruah jih keu asoë syeuruga…

Read More

Aneuk Dara Mita Reubong

Aneuk Dara Mita Reubong

Oleh : Nyak Kaoey

Bak saboh jameun masa uroe nyan, hudep keuh saboh keuluarga sederhana. Dalam keuluarga nyan na sidroe mak ngoen dua aneuk dara yang mulai balegh. Mak jih nyan ka tuha, semeuntara lakoe geuh ka trep meuninggai. Keu udep si uroe-uroe, mak tuha nyan keureuja jeut keu tukang mita gutee bak ulee gob. Aneuk dara jih tiep uroe mita reubong lam uteun. Reubong nyan di publoe, seubagian geupeujeut keu gulee. Gampong nyan memang mahsyu deungoen gulee reubong.

Alkisah bak si uroe, watee geutubiet dari lam uteun bak mita reubong ngoen oen paku, bandua aneuk daranyan diseutet lee sidroe aneuk agam. Bak hi agamnyan ureueng kaya. Bak geukaloen dua aneuk dara tari tubiet lam uteun, agam nyan geuseutet sampee troh u rumoh si Dara.

Troh rumoh si Dara, geukaloen keu aneuk dara nyan tinggai dalam jambo, agam kaya nyoe han geuteujeut tamoeng. Si Agam woe balek u rumoh geuh ngoen teumanyoeng- manyoeng lam ate.

Singoh beungoh jih, si Agam nyan jak lom meulum dua aneuk dara gasien nyan. Geukaloen lom bandua dara nyan tamoeng lam uteun. Si Agam geuseutet laju sampe troh lam uteuen. Agam nyan geuperhati but si Dara. Bak geulum dari seumak-seumak, geukaloen keuh aneuk dara nyan teungoh geupoet reubong ngoen oen paku. Watee woe geuseutot lom dari likot sampee trok u rumoh si dara lom.

Lageenyan keu sabee tiep uroe. Agam kaya nyan sabee geulum dua dara tari aneuk janda gasien gampong nyan. Bak si uroe si Agam han ek geutheun lee. Akhe jih bak saboh watee si Agam jijak u rumoh janda gasien nyan. Meunan geutamoeng lam rumoh, si Agam laju geu ungkap asoe ate. Geupeugah keuh jih keuneuk meukawen deungoen salah saboh aneuk dara nyan.

Bansaboh rumoh teukeujet bak jideungoe meuheut agam kaya nyan. Phoen that mak si Dara han geupateh haba si Agam, tapi si Agam geupaksa laju meuheut meukawen ngoen aneuk janda nyan. Akhe jih janda nyan teupaksa geu jok aneuk gobnyan nyang tuha geupeukawen lee agam nyan. Yoh leuh meukawen si Tuha woe ngoen lakoe. Lam jambo nyan jinoe tinggai janda tuha sidroe dua ngeon si Tulot.

Uroe meugantoe uroe, umu janda nyan meutamah tuha. Akhe jih janda nyan saket. Jinoe janda tuha nyan teu eh bak teumpat eh hana ek meumetle. Gobnyan geukeumiet lee si Tulot, seumeuntara si Tuha hantom le gewoe u rumoh. Si Tuha ka udep seunang dua ngoen lakoe di gampong meurandeh.

Kareuna breueh di rumoh ka abeh, janda nyan geuyuo si Tulot jak u rumoh akakjih jak lakee breueh si’at. Si Tulot jak u rumoh si Tuha. Bak akakjih nyan, si Tulot geuceurita teutang keudaan mak gobnyan nyang saket. Geukheun lee si Tulot, “Mak tanyoe lake breueh dua neuk. Mak jinoe teungeh saket.”

Meunan geudeungoe haba si Tulot, si Tuha geujaweub, “Mangat mantoeng lake-lake breuh bak gob, peu kah pike breueh nyoe kuteumee lageenyan mantoeng?! Hana lam donya nyoe nyang mangat nyan gratih, mandum peurlee but, peurlee reuoh.”
“Tapi mak nyang lakee, Kak. Mak tanyoe teungoh saket.” Geuseuot lee Tulot.
“Kapeugah bak mak kah, keurja ilee, baro loen jok breuh.” Kheun si Tuha.

Singkat haba, si Tulot jiuse lee akakjih. Si Tulot woe u rumoh ngoen rhoe ie mata. Troh u rumoh, bak jikaloen mak jih mantoeng bak teumpat eh, si Tulot han jiteujeut peugah keujadian bak rumoh akakjih. Si Tulot geumeusom bak dapu. Bak bineh sinungkee geuduok sira jipeutheun ie mata.

Bak geudeungoe na ureung moe bak dapu, si Janda nyang mantong bak teumpat eh geumariet. “Hai, Tulot, peukeuh kah nyang di dapu? Pakoen gohlom kajak bak akak keuh?”

Na meupadum ge mak nyan geuulang haba-haba soet sabeub hana jaweuban dari dapu. Ka na meupadum ge geudeungoe, barolah si Tulot geuseuot dari dapu. “Siatreuk loen jak bak akak, mak.”
Meunan geudeungoe suara Tulot lagee ureueng moe, mak jih geuteumanyoeng lom. “Peu kapubuet teuma di dapu nyan? Pakoen kamoe, Neuk?”
“Koen uloen moe, Mak, mata loentuan jitamoeng abee. Loen teungoh peugleh dapu.” Seuot si Tulot.
“Kajeutnyan, kajak ilee bak akakkah, entreuk kapeugleh teuma.” Kheun mak jih lom.

Si Tulot jak lom u rumoh si Tuha. Troh rumoh si Tuha, si Tulot jiusee lom lee si Tuha. Na meupadum goe si Tulot jak-jak woe dari rumoh jih u rumoh akakjih meulakee breueh. Tapi sabee jiusee lee akakjih. Akhe jih si Tuha geukheun bak adekjih. “Jeut kah peuwoe breueh loen, menyoe kah katem keurja bak loen.”
“Peu keurja nyang jeut loen pubuet, Kak?” Kheun si Tulôt.
“Kamita gutee bak ulee loen trok ‘an abeh, euntreuk loen jok breuh si khai keukah dua ngoen mak.”

Bak jipike keu mak nyang saket, si Tulot Akhe jih geutem mita gutee si Tuha. Lageenyan keu sabee jeut-jeut uroe. Si Tulot jak u rumoh akakjih keu mita gutee. oh si Tuha meurasa ka abeh gutee bak ulee jih, baro geujok breueh si khai keu si Tulot. Breueh nyan geupuwoe laju lee si Tulot u rumoh geuh. Troh u rumoh, breuh nyan geutaguen dua ngoen poma.

Bak si uroe, teungoh geumaguen di dapu, si Tuha geurasa gatai that ulee jih. Bak geugaroe-garoe ulee, jiteumee saboh gutee teusangkot bak gukee. Bak geukaloen manteng na gutee bak ulee jih, si Tuha meurasa keunoeng pengeut lee adekjih. Meunan lheuh bu, si Tuha laju jak u rumoh mak jih.

Bansaree troh di rumoh makjih, si Tuha laju geuteumeunak. Si Tuha geuteunak adekjih sira jiklik-klik meuhoi si Tulot. “Hoi Tulot!!! Ka kapeungeut kee kah nyoe?! Patkah?! Bak kameusom, katubiet bagah! Hoe kame breueh kee?!”
Meunan geudeungoe su si Tuha teumeunak, makjih nyang mantong lam saket teukeujet bukoenlee wayang. “Peuna aneuk loen? Pakoen gata?” Kheun mak nyan keu si Tuha.
“Hoe aneuk kureueng ajanyan! Ceubeueh that jih jipeunget loen, heu?! Tulot kureueng aja… katubiet bagah!!!” Kheun Si Tuha lom.

Bak geudeungoe nanjih sabee-sabee geuteu'eh, si Tulot tubiet dari dapu. Meunan geukaloen si Tulot tubiet, si Tuha meutamah beungeh. Laju geutarek bajee si Tulot.
“Aneuk cangklak, cukop galak bak kapeungeut kee! Hoeka kah mee breueh kee. Kapulang bagah keunoe!” Kheun si Tuha sira geutarek oek si Tulot.
“Breueh nyan koen kaleuh akak jok bak loen dua ngoen mak? Kaleuh loen taguen keu mak, ka kamoe pajoh.” Seuot si Tulot teumakot.
“Aneuk glang teutak, cukop cangklak bak kapeugah haba. Uloen bri breuehnyan meunyoe keureuja kah ka seuleusoe. Peu keneuk kapeungeut kee, kah?! Bunoe kuteumee manteng sabohtreuk gutee bak oek loen.”
“Jadi pakiban, Kak? Breuh nyang akak bri bunoe kaleuh kamoe pajoh dua ngoen mak. Singoeh uloen mita lom gutee akak.” Kheun si Tulot lom.

Si Tuha beungeh bukoenlee wayang bak geudengoe seuot si Tulot. Si Tuha geuyue bak mak ngoen adekjih nyan geupeumuntah lom breueh nyang kaleuh dipajoh. Kareuna han mungken geumuntah lom, si Tuha jak u dapu jak cok aweuk. Deungoen aweuk nyan, geukurek babah makjih ngoen babah adekjih.
“Han kupeuizin breueh loen kapajoh. Peutubiet mandum breuh loen bunoe.” Kheun si Tuha sira gekurek laju reukung makjih ngoen reukung si Tulot.

Dari dalam babah si Tulot ngoen makjih jitubiet darah. Akhe jih bandua awaknyan hana meudaya le. Geukaloen awaknyan hana le daya, barolah si Tuha geuwoe u rumoh geuh.
Alkisah, si Tulot hana le dijak mita gutee u rumoh akakjih. Jinoe si Tulot gisa lom lam uteun jak mita reubong. Tapi malang naseb si Tulot, ka rab abeh ban saboh uteun jiwet, gohlom jiteumee lom bak trieng nyang mantoeng meureubong. Rata-rata kajeut keu trieng.

Si Tulot dijak wet laju ban saboh uteun. Kaleuh geuniet lam ate han geuwoe sigohlom meuteumee reubong. Jih hana ek le jikaloen pomajih jimoe kareuna hana geupeuwoe reubong. Si Tulot teutap meuusaha. Bak geuwet-wet, geukaloen keuh saboh rimbon bak trieng. Bak geupeutoe, deuh sibak bak reubong nyang raya. Ate si Tulot bahagia bukoenlee. Tapi eh jikaloen reubong nyan, ate teuh meubah teumakot. Bak bak reubong nyan meulilet saboh uleu Lhan itam nyang raya.

Lam ate si Tulot meuheut that meucok reubong nyan. Saweub kaleuh jikeulileng ban saboh uteun hana meureumpok meisibak reubong pih. Tapi bak jikaloen uleu nyang raya nyan, harapan jih sirna. Si Tulot geudeng bak teumpat jih sira meudo’a lam ate uleunyan beujijak sigra.

Bak teungoh geudong-dong, si Tulot teukeujet ngoeng saboh suara. “Neucok keuh loen tuan ikot deungoen gata.” Kheun suara nyan.
Si Tulot geukaloen seuseulingka, tapi hana deuh meusidroe manusia. Bulee kudok jih jibeudoh. Suara nyan meusue lom. “Neucok keuh loentuan ikot deungoen gata.”

Si Tulot meutamah takot sabeub hana jiteumee meusidroe ureung di seulingka. Bak geukaloen keudeh keunoe, mata si Tulot meureumpek keuh ngoen uleu nyang na bak bak reubong nyan. Tulot geukaloen bak uleu nyan. Jideungoe lom suara nyang sama lagee bunoe. “Neucok keuh loentuan ikot deungoen gata.”
Barolah meuphoem jih, suaranyan nakeuh dari uleu nyang na bak bak reubong nyan. Uleunyan geumarit lom, “Neucok keuh loentuan ikot deungoen gata.”

Deungoen ragu-ragu, si Tulot geupeutoe uleu nyan. “Peukeuh beutoi gata nyang mariet bunoe, wahai uleu?” Tanyoeng si Tulot.
“Beutoi that. Neucok keuh loentuan ikot deungoen gata.” Kheun uleu nyan lom.
“Pakiban cara uloen ba gata?”
“Bukoenkeuh gata keuneuk cok reubong nyoe? Kuoh reubong nyoe, bek neukoh, euntreuk luka tuboh loen. Kuoh dari dalam tanoh sampee ukheujih. Lheuhnyan cabot reubong nyoe. Neubakeuh uloentuan deungoen reubong nyoe u rumoh gata.”
Ban lheuh geudeungoe haba uleu nyan, si Tulot laju geukuoh bak reubong nyan. oh lheuh nyan, reubong ngoen uleu nyan geupuduk di ateuh oen eumpeuk. “Pakiban lom?” Tanyoeng si Tulot bak uleu.
“Neupeuwoe loentuan u rumoh gata. Reuboh tuboh loen saree reubong nyoe. Reubong nyoe bek neucang. Peutamoeng laju lageenyoe lam beulangoeng sare tuboh loen.” Kheun uleu.

Meunan lheuh geudeungoe haba uleu nyan, si Tulot geupeuwoe saree uleu ngoen reubong. Ban saree troh rumoh, reubong ngoen uleu nyan geureuboh seusuai haba uleu bunoe. Ka cukop trep si Tulot jipreh reubong nyan, tapi bek keumasak, meu jue golom ie lam beulangoeng. Bak geupreh-preh masak reubong nyan, si Tulot roh geuteungeut bak teumpat duk geuh.

Meunan teujaga dari teungeut, kon wayang teukeujet si Tulot. Dapu jih ka meuubah. Bansaboh rumoh ka meuubah ceudah. Binteh rumohjih ka meukilat. Bak saboh sagoe rumoh, meuumpang-umpang breuh teupuduk di sinan. Di ateuh meja ka teupuduok bu leungkap deungoen teumon bu. Rumoh jih ka meubah leungkap deungoen seugala keubutuhan udep.

Si Tulot teukeujot, laju geupluong bak kama mak jih. Leubeh teukeujet lom jih meunan troh bak kama mak jih. Di ateuh teumpat eh, mak jih ka teuduk sira tahe-tahe syit. Deuh keu geukaloen lee si Tulot lapak teumpat eh mak jih ka meuubah meukilat lagee kulet uleu. Si Tulot teuingat keu uleu ngoen reubong nyang jireuboh bunoe. Laju jiplung lom u dapu. Meunan troh u dapu, geusalop laju tutop beulangoeng, tapi hana geuteumeung le reubong ngoen uleu bunoe.

Si Tulot tahe teudeng bak bineh dapu. Tahe na, seunang na, tuemakot pih na. Bak teungoh bingoeng-bingoeng teudeungoe bak jih saboh suara dari lua. Suara di lua geubri saleum. Ban saree jideungoe suara nyan hi suara uleu nyang direuboh bunoe, si Tulot laju jiplung u lua. meunan troh bak pinto, jikaloen lee si Tulot sidroe aneuk agam teudeng bak babah pinto. Agam nyan meupakaian rapi ceudah lagoina. Bak ulee jih meuikat ija itam meubintek-bintek puteh, hi kulet uleu Lhan.

Agam nyan geubri saleum lom, geulakee izin tameng lam rumoh. Ban saree troh lam rumoh, dikeu si Tulot ngoen mak jih, agam nyan meungaku seubagoe pangeran nyang meenyamar jeut keu uleu Lhan bak watee si Tulot jak cok reubong. Jadi uleu nyang meulilet bak reubong nyan nakeuh droe pangeran nyan. Kareuna keusucian ate si Tulot, pangeran nyan keuneuk meukawen deungoen si Tulot.

Meunurut Pangeran nyan, meunyoe bunoe si Tulot geucang reubong nyan, mungkin Pangeran ka mate. Tapi kareuna kesucian ate si Tulot nyang mat amanah, reubong nyan hana dikoh. Kareuna nyankeuh pangeran meulakee si Tulot beujeut keu peurumoh gobnyan.

Singkat haba, bandua pih meukawen. Jinoe rumoh janda nyan ka jeut keu rumoh meugah. Macam-macam keubutuhan udep na bak rumoh gobnyan. Gobnyan pih udep bahagia deungoen si Tulot ngoen lakoe jih. Janda nyan puleh dari saket jipeuubat lee si Pangeran. Rumoh awaknyan ramee geukunjong lee ureung gampong jak lakee tulong. Awaknyan pih saba geutulong ureueng-ureueng gampong nyan. Hantom geutulak meunyoe na jamee troh u rumoh.

Seumeuntara aneuk janda nyan nyang tuha jinoe udep meularat. Lakoe jih hana le keurja. Lakoe si Tuha ka saket, seumeuntara hareuta geuh ka habeh. Breueh hana le di rumoh. Jideungoe lee si Tuha jinoenyoe mak ngoen ade kjih ka jaya, si Tuha jijak u rumoh mak jih keuneuk lakee tulong.

Bansaree troh di rumoh mak jih, si Tuha jipeugah haba, “Baroekoen awak droen meulakee tulong bak loen, jinoenyoe loen teuma meulakee tulong bak gata. Neujak loen mita breueh meu dua neuk.” Khuen si Tuha.

Geuseuot lee si Tulot, “Baroekoen mak peureulee breuh, neuyu loen keureuja bak gata. Nibak uroenyoe kamoe bri breuh keu gata, peu keureuja nyang jeut gata pubut keu kamoe? Peukeuh gata keuneuk kurek lom reukung kamoe?”
Bak geudeungoe haba si Tulot, si Tuha malee keudroe. Akhe jih si Tuha jiwoe u rumoh geuh. Breuh hana jiteumee, malee nyang jirasa.

Sahibul hikayat, bak peutheun malee, si Tuha hantom le jijak u rumoh mak jih. Bahkeuh hana breueh di rumoh, jipeuteun deuk dua ngoen lakoe. Na meupadum trep lheuhnyan, si Tuha pih mate di rumoh droe dua ngoen lakoe kareuna bak peuteun deuk ngoen malee.

Seumeuntara si Tulot udep bahagia ngoen sang lakoe. Geurawat mak droe deungoen gaseh sayang. Hana tuwoe syit geutulong ureueng gampong nyang jak u rumoh gobnyan.

Meunankeuh jikeun lee haba jameun, nyang get bak ureungchik meuteumeung beurkah, nyang khianat meuteumeung laknat. Si Tulot pih meuteumee nikmat. Seumoga na beurkah nyang jeut ta cok dari calitra nyoe

Read More

SIDOM

SIDOM

        "Gam ! Gam !" kheun ma.
        Hana soe seu ôt.. Si Gam hana di rumoh. Ma geujeungeuk uyub. Jiyub pi tan cit. "Ho ka jijak aneuk meutuah nyan", kheun ma lom.

        Ma geutrôn leugat. Geungieng keudéh geungieng keunoe. Si Gam hana cit leumah.
        "Untông na dilampôh, "kheun ma. Ma pi geupeukeu u likôt moh. Nyo bit na si Gam sinan. Jéh pat jih, bak sagoe pageue. Jidong sidroe seungab raya. Nyang na meugrak sigo sigo cit meu jaroe.

        "Gam! peue beuet kah sinan, neuk?" tanyong ma. Ma geupeutoe keunan.
        "Neu eu keuh hai ma. Dumnan le ka lôn poh, mantong cit jiteuka," kheun sigam.
        Si Gam jitunyok bak bangké sidom ateueh beunteueng. "Aneuk mak !" kheun ma. Nyoekeuh buet kah seungab that sinoe ! Bèk lé neuk. Buet nyan hana gèt. Lom pih han mée Peue loem tajak inanya ateueh sidom? Sidom hana meudéesya. Sidom hana jipeurugoe geutanyoe. Sabab nyan pakon tabeukaru jih?

        Nyang gèt tatueng tirèe bak sidom.
        Dua peue nyang gèt tatueng peuleuoh sidom.
        Keu sa meujeulih. Keu dua jeumot."
        "Na kakalon watèe jijak sabè jimeurumpok ?"
        "Na," seuôt si Gam. "Nyan kon teungoh jimeurumpok. Nyoe lom, ma ! Nyoe lom !"
        "Nyan bandum jimumat jaroe. Kah na tom kamumat jaroe ?"
        "Han tom."
        "Meunyo meunan meujeulih sidom ngon kah. Lom pih hana binatang nyang jeumot dum sidom," kheun ma lom.

        "Kakalonkeuh sunggôh han ban Jiaeuangkôt. Hana jipiyôh - piyôh sagai. Kadang-kadang raya dabeueh ngon badanjih. Bit pih meunan jimè cit. Han èk sidroe jimeurame."
        "Peue jimè nyan ma ?"
        "Peunajôh."
        "Ho jimè peunajôh nyan ?"
        "Jipuwoe keu aneuk peurumohjih. Nyoe le that ka kapoh. Soe keuh puwoe lom peunajôh keu aneuk jih? Sayang aneuk - jih, hana soe bri eumpeuen lé. Yahjih ka maté kapoh lé kah."
        "Han lôn poh lé ma," kheun si Gam.
        "Bit han ?" "Bit". Bôh jak lèh tawoe kamanoe.

Oleh : (Lhèe Saboh Nang)

Read More