Sabtu, 01 Mei 2010
Wi fi
Karya : Mustafa Ibrahim
Bacut lon peugah haba lon chi chi
Nyoe jameun Wi-fi ka troh ji teuka
Rab mandum kanto ngon warong kupi
Internet wifi ka tersedia
Leupah that mudah bak silaturrahmi
Ngon dua jari dan layeue kaca
Pangkai hana le dua lhee tali
Saboh glah kupi ngon sikrek bada
Dumna berita sigra keutahui
Saweub informasi tan le kendala
Walaupun jarak juoh han sakri
Sidroe di Sigli sidroe di jawa
Tapi that sayang wahee e akhi
karena Wi fi tuwoe sikula
siuroe suntok bak warong kupi
bak poker judi peulale mata
nyang galak fesbuk nyan laen lagi
komen geurasi nibak beranda
memacam bagoe sesuka hati
na jatoh hati na nyang sakit kepala
habeh gob teupeu masalah pribadi
tan le privasi nyang jeut rahsia
mulai kude kurap bak gaki
meunan cit wali bhah rumoh tangga
na syit nyang laen wahe e dekti
bak gamba keuji laman geubuka
deuh ureung teulhon Allahu rabbi
lagee di Bali bak pantai kuta
