Sale

Sale

Karya T.A. Sakti


Ureueng saket brat jameun geusale
Nyang payah rande sabab leumiek pha
Atawa gob poh ka patah pate
Rhot dicong munje atau cong pala

Di ureueng inong madeueng hana bre
Rhah ija tumpe manyak baro na
Jagale Mablien sinan peulale
Bit ubat Sale lethat seumpeuna

Jinoe ka maju ubat meuseu-e
Keu ubat Sale tanyoe ka lupa
Ban saket bacut laju u Keude
Ba peng siare Mantri ngat kaya

Nyang saket patah uroet hana bre
Nyang patah-pate meunan usaha
Eh ateueh panteue atawa bale
Apui meuhe-he diyub geupuga

Buet ureueng teuga tungoe geurande
Seumpom meuseu-e dileuen meutimpa
Atot bak puno; uram bak munje
Tangkok bak mane; ukheue bak sala

Jameun that mudah ureueng Seumale
Kayee meuseu-e ube-be raya
Jinoe ka langka; bah gampong-keude
Rang kapeue kayee jinoe jareueng na

Ban ulontuwan gampong toe keude
Niet tameusale payah lagoina
Lon bloele arang dua-lhee pate
Ngon nyan seumale ka sithon lama

Dalam pot bungong arang ulon ple
Minyeuk lon re-re apui ngat nyala
Watee hu kalen seu-uem meuri bre
Hanale lale reudeup lon raba

Asap bak reudeuep ubat meuseu-e
Digampong lon me kayee ka langka
Alhamhadulillah ucap tan lale
DM ngen beusee bak lon kureueng ka

Na ureueng tuha lon kalon dilee
Puteh oek ulee bungkok leupahna
Tapi teuga that kha lagee batee
‘Oh dicong kayee talo nyang muda

Ek U tiep uroe hana pre watee
Keu breueh siare cit nyan keureuja
Lheueh ek dua bak; geutamah lom lhee
Teuga ban cage Allah karonya

Gobnyan tiep malam geu-eh cong Bale
Apui tan padee diyub meubura
Aleh sabab nyan teuga tan lagee
Meunan keuh dilee ureueng dum teuga

Takalon jinoe ureueng dum lhek-phe
Leumiek ban tape bah muda-muda
Peunyaket ramien ban kuwah tuhe
Umu takire baro peuet plohsa!!!

Read More

Gampong Keureupuk Mulieng

Gampong Keureupuk Mulieng

Karya Mustafa Ibrahim


Assalamualaikum kawom muslimin
Kaya ngon gasien duson ngon kuta
Bacut na haba bak lon teungku din
Nyoe gampong Mulieng malang leupah na

Rakyat gampoeng ka kiwot kiwieng
Tapi peumimpin geuhiroe tan na
Abeh dum dana keu biaya rutin
Keu ureung gasien peumbangun hana

Jalan lam gampoeng meugulong gulieng
Seudeh oh tangieng keu rumoeh sikula
Buboeng ka teuhah di pot le angen
Teuma bak binteh ka kamue seuba

Nyang kaya-kaya peunajoh boh drien
Nyang gasien-gasien pajoh boh meuriya
Weuh hate lon oh watee lon ngieng
Keu ureng gasien tan na soe kira

Wahee e teungku bapak peumimpin
Beurajin - rajin neutron u desa
Neukalon rakyat kabeh meukuwien
Pajoh breuh raskin ngen bajee monja

Read More

Ubat Gampong

Ubat Gampong

Karya T.A. Sakti


Keu ubat gampong bacut takisah
Lon meubeurakah meudua banja
Ubat endatu watee ka sudah
Hansoele papah jameun ka bida

Jinoe ka canggeh ubat that mudah
Hana that payah bak tajak mita
Asai beuna peng nyang on-on mirah
Meuh’ei sileupah ubat kiminya

Di ureueng gampong sabe lam susah
Seureuba salah ‘ohtee geukira
Ubat that meuh’ei; pade that murah
Peunyaket jajah hana bak tunda

Siare pade hansep pel siblah
Bit popeurintah geukira hana
Yum barang gampong sabe lam murah
‘Oh akhe sudah soe meugoe hana!

Sy’ob hai katuwo keu uram kisah
Lon peuwoe bagah u punca teuma
Proe ubat gampong; boh gadong tuwah
Kumili, birah paleng utama

Endatu tanyoe meunan geupeugah
Boh gadong,birah,kumili tiga
Lam sithon sigo tasak lam babah
Ube na wabah meusiblah dumna

Dumpeue peunyaket Tuhan peusiblah
Ngon Insya Allah teukabo bekna
Gule bak leubue tataguen kuwah
Lam sithon beusah siblet tapeuna

Geukrut putik U peh lada siblah
Tipek beubagah nibak dhoe gata
‘Oh saket ulee sang-sang ka beukah
Deungon Bismillah mustajeueb beuna

Jan saket batok khak-khok sileupah
Mita beubagah on rabon muda
Ramah deungon ie peujeb sikhan glah
Ngon Insya Allah pulehle teuma

Kadang saket pruet na angen mirah
Gambe cok siblah tabicah sigra
Ta upa bak pruet ngat diruet bagah
Ab-’eb bak babah t’ang-t’eung lungkiek pha

Ngon boh keumeudee pih teuntee leupah
Le angen mirah pruet ureueng tuha
Keumadee masak syulok keu lincah
Bahthat bee babah geuntoet that subra

Kadang na kurab lungkiek pha beukah
Meunye na mudah on drang neumita
Ngon gapu ranub neupeh beubicah
Neu intho bagah dalam luengkiek pha

Meunye na teuceue wable seumeurah
Gambe nyang mirah laju neu upa
Ngon on sikleueng-kleueng pih Mustajabah
Sayang sileupah bak jih ka langka

Dum kayee ubat langka sileupah
Dilee Universitas Syiah Kuala na geuci pula
Jiteukale khueng payang sileupah
Lampoh nyang luwah ka “talo” sigra!!!

Read More

Balada Jurnalis Muda

Balada Jurnalis Muda

Karya Mustafa Ibrahim


Jurnalis muda garang han bagoe
Rata jeup sagoe mita beurita
Camera raya geumat bak jaroe
Malam ngon uroe gadoh cok gamba

Ubena kartu geulhat bak taloe
Gantung bak takue peuleumah gaya
Goh lom sileuweue ka cumpeng cumpoe
Ta eu that bakoe Beukah dum bak pha

Yang leupah hireun wahee cut adoe
Jareung geumanoe Cuma rhah muka
Teulat beudoeh eh nyan syit ka buet droe
Dak sikat gigoe pih meujan-jan hana

Ok geu peu panyang sampe teutop dhoe
Jeut sampoh jaroe geunantoe ija
Ngon bajee oblong jareung geu gantoe
Gukee bak jaroe ka itam sukla

Kupi saboh glah ureung jep lhee droe
Siteugok sapoe geubagi rata
Rukok sibak guepiep meugantoe
Meunan keuh bagoe takalon rupa

walaupih meunan hudep dikamoe
nyan idealisme teutap meu jaga
say o to Amplob motto di kamoe
walaupun asoe kadang meu raba

lon lakee meuah bak aduen adoe
kon maksud lonnyoe untuk meucela
untuk refleksi keurakan kamoe
yang kalaheuh baroe geupeuwisuda

Read More

Hikayat Aceh ; Tanda-tanda

Hikayat Aceh ; Tanda-tanda

Karya T.A. Sakti


Jameun kon ngen jeuem watee geukira
Ngon tanda-tanda nyangka Tuhan bri
Jimeusu Sareuek ‘oh malam jula
Jeuem rab poh tiga teuka pancuri

Ka kr’eb-kr’ob Itek jitoh boh subra
Bu Sawo sigra taguen hai Ummi
Ji meusu Cangguek riyoh ka reuda
Imsak rab teuka beuhati-hati

Ngon cikuwaciii… meusu Cempala
Beungoh ka teuka beudoh ushally
Beurijuek Balee kiroh meutaga
Mata uroe ka mirah han sakri

Kadang ‘oh beungoh Got-got pih gabra
Nyan saboh tanda ujeuen meunanti
Beurijuek Balee meunye nyang subra
Tanda uroe kha siya meutie-tie

Ureueng peubuet-buet ngieng tanda-tanda
Pajan keureuja meujan khanduri
Geuadee pade janna uroe kha
Beungoh na tanda ka Beurijuek bri

Got-got that riyoh ujeuen toe teuka
Pade ngen ija bek adee Cutti
Laen pih meunan dumpeue usaha
Dum tanda-tanda karonya Rabbi

Bungong poh siploh pih jeuet keutanda
Keumang meunyala ohtroh hat janji
Bungong keupayan keumang ‘oh ‘asha
Mata uroeka poh 4 leubeh hi

Jaku’uek manok karu sa-duwa
Luho ka teuka jeuet jak ushally
‘Ohka meut’i glang meughreb hai Cutda
Jeuet jakwoe sigra bekle meucakri

Duek di Meulasah dang-dang troh ‘Isya
Teureubang Ara ho nyang ji ili
Kadang troh jipo Buloh Blang Ara
Ka watee ‘Isya jeuet kheun ushally

Tapi ‘oh jinoe sapeue tan tanda
Geulantoe kana jeuem jaroe tari
Atawa su Mick watee Bang ‘Isya
Bandum ka langka binatang tadi

Beurijuek tanle Sareuek pih hana
Cot-got Cempala droble pancuri
Cakeuek nyang meusu jan uroe sinja
Jinoe jareueng na tadeungo bunyi

Kadang u gunong peusiblah mara
Wab manusyia jeumoh han sakri
Abeh binatang didrob publoe ba
Trok bak Meuruwa dilhak kuliti

Astaghfirullah ka leupah haba
Kaya Rabbana reuen-mareuen neubri
Dumna latbatat nyan tanda-tanda
Mahakuwasa Tuhanku Rabbi!!!

Read More

Aneuk Beu-o

Aneuk Beu-o

Oleh T.A. Sakti

Ureueng beu-o hana saho roeh
Hana peue pajoh ‘oh watee tuha
Jinoe yoh muda beusunggoh-sunggoh
Mangat dumho roh ‘oh watee jaya

‘Oh watee beungoh kayem lam riyoh
Tapeugoe ah-oh han jitem jaga
Baro meurasa geuba peunyampoeh
Gantoe Ma kiroeh nibak seumubla

Bak aneuk beu-o tayue sampoh broeh
Kayem dipiyoh nibak keureuja
Tayue jak saweue campli di lampoeh
Sabe cit kiroh lam dimeudawa

Tayue jak ublang dijak peuhah coeh
Neulop beureutoeh unja jihila
Tayue top ateueng ngat tadrop tikoeh
Ateueng ka putoeh jitubok raya

Tayue jak ugle ji saweue lampoeh
Sampe poh siploh goh troeh jigisa
Tuwo jitoep ret dak jeuet tabloeh-bloeh
Kabeh bui pajoeh seunaman nyang na

Dijak bak Teungku jibeuet tan sunggoeh
Dale meuratoeh jipeugah haba
Geudhoetle Teungku jih mantong riyoh
Awe plah tujoeh baro tan subra

Bak jak sikula jareueng nyangna troeh
Kayem dipiyoh bak rangkang tuha
Jan rakan jiwoe dijih pihka troeh
Sang saban sunggoeh takalon rupa

Takalon raport hate teuh putoeh
Ban saboh tuboeh mirah meucula
Dijih tan malee tan sagai kiroh
Nyang na cit riyoh ayah ngen poma

Hek kutaguen bu hekku teumeucroeh
Jiteubiet reuoh bak kurah ija
Kajak sikula tan sunggoeh-sunggoeh
‘Oh hana luloeh teuman ka rasa

Palak diayah geumat peunyampoeh
Diplueng beureutoeh sigam lam paya
Trok dua uroe jiwoe gohlom troeh
Ka geumeuratoeh geumoe dipoma

Sayang ureueng syik aneuk lam tuboeh
Adak jeuet beutroeh lagee geucita
Aneuk beucarong, rayek dumho roeh
Sabab ka utoeh manyang sikula

Meunye cit bangai hana saho roeh
Rangkasoe utoeh cit gob jak mita
Uleh seubab nyan wahe adoe beh
Beusunggoeh-sunggoeh watee yoh muda!!!

Read More

Hikayat Cangguek Pong

Hikayat Cangguek Pong

Oleh M.Y.Bombang


Amma ba‘du e adoe boh hate
Dengo lon ca‘e saboh calitra
Peukateun cangguek gura bukon le
Oh musem pade ujeuen keunong sa

Bak saboh watee deungo lon kheun ban
Uroe ngon malam ujeun tan reuda
Ie dalam parek meulimpah jalan
Ie di dalam blang han pue takira

Cangguek meudawa gura kon wayang
Sideh dalam blang lam parek pih na
Teuma nyang ladom wahe e rakan
Aneuk deungon nang ka jimeuseunda

Ladom meu pep-pep ngon sabe rakan
Ladom hai cut bang meuca‘e sama
Nyang leupah gura deungo lon peutrang
Cangguek pong itam ngon cangguek sira

Meupansie haba oh jula malam
Ta deungo langgam subra lagoina
Miseu geutannyoe ngon sabe rakan
Neudeungo rijang meunoe umpama

Pooooppp.......Tuaannnnnnnn.....
Na bakoooong........ Taaannnnnnnn......
Pane ka woe......Di blang.......
Pakon raya pruet.....Troe that diulontuan...
Pue ka pajoh......Daruet canggang.....

Poooop.......... Tuaaaannnnnn......
Na bakoooong.........Taaaannnnnnn......
Pane ka woe.......Lam parek tuan....
Pakon raya pruet.....Troe that diulontuan....
Pue ka pajoh......Jalan.........

Poooop........ Tuaaaannnnn.....
Na bakoooong........Taaaaannnnn.....
Pane ka woe........Lam lueng tuan....
Pakon raya pruet......Troe that lontuan.....
Pue ka pajoh.......Jembatan........

Poooop.........Tuaaaannnn......
Na bakoooong.......Taaaaannnnn.......
Pane ka woe........Di blang........
Pakon raya pruet.... Troe that lontuan...
Pue ka pajoh........Kapai........

Pooop............Tuaaaannnn......
Na bakooong........Taaaannnn.......
Uroe nyoe pue ka ueut.....Peulabuhan tuan...
La‘en pue lom......Boh rom-rom tuan....
Singoh pue lom.......Pue-pue nyang na tuan....

Read More