Minggu, 27 Februari 2011
ADAT ACEH
Adat Acèh bak riwayat,
Bacut sapat dudoe teuka.
Adat jinoe dilèe bak jad-bajad,
Jinoe sahbat tan lé rupa.
Sopan santon deungon adat,
Reusam adat ganu gana.
Nyang gèt geucok sikrak sapat,
Ban nyang babat ateueh kada.
Peutama phôn dalam kitab,
Bangsa Arab nyang peuteuka.
Meujeulisan lam bab adat,
Sinan le that kheun ulama.
Nyang keudua bak Meulayu,
Nibak Hindu deungon Jawa.
Nibak Cina na sigitu,
Adat Badu ngon Malaka.
Yôh jeuet bangsa ka meutabu,
Arab Badu deungon Manila.
Bangsa Jawa ngon Meulayu,
Le that teungku ureueng teuka.
Hingga rame nanggroe rnakmu,
Murah breueh bu deungon ija.
Nyan keuh sabab adat karu,
Barat timu laén rupa.
Susôn basa rab Meulayu,
Barat timu bacut biza.
Basa Arab na sigitu,
Jampu bau laén pih na.
Bak peukayan dum ban laku,
Ureueng Hindu nyang peuteuka,
Cuba tilék tingkah laku.
Bajèe badu ladum pih na.
Oleh : (Sangga mara oleh T. Mansur)
