Rabu, 25 Mei 2011
ALMANAK ACHEH
Sistem almanak Acheh geupeuget le indatu ureng Acheh ngon basis Islam. Basis uro jih pih lagee lam sistem Islam, meunurot buleuen, sampo lam basa Acheh takheuen sistem uro lam almanak nyan urobuleuen. Teuma watee ka keunong peungaroh basa Indoneusia (basa Keulayu, kon Meulayu), kata urobuleuen nyo meuganto jeuet keue tanggai. Teuma lam basa Malaysia, kata Meulayu nyo mantong lagee asai, haribulan. Jeuet le indatu ureung Acheh uro jeh geukheuen urobuleuen nakeuh mongken sabab dasar sistem almanak jih bak perubahan bentuk buleuen (basa ‘Arab: manzilat), dari bentuk sadeuep keue bulat keue meu-ulang bak bentuk sadeup teuma.
Lam sistem almanak Acheh nyo, lagee lam almanak Islam (almanak Hijrah), phon uro nibak watee Mugreb, watee ilop matauro. Nyan keuh sabab jih geutanyo takheuen, miseue, malam Jeumeu’at, kon Hameh malam, sabab bak malam nyan ka jitamong Jeumeu’at. Singoh uro jih uro Jeumeu’at. Akhee malam bak watee Suboh, watee leumah fajar keudua i timu. Siat sigohlom watee suboh, (watee saho lam buleuen Puasa), mantong teukira malam, dan uro jih mantong takheuen “singoh”.
Urobuleuen sa nakeueh watee buleuen baro, siat lheueh matauro ilop blah barat, bak horizon barat bacut i wateuh ufuq deueh buleuen, biasa rayekjih ubee “daqiq”, yakni kira-kira ubee ginong jaro. Jameuen dilee ramee ureung Acheh nyan jeuet geubileueng urobuleuen (geuhisab), saboh ‘eleumee nyan lawet nyo ka hana kayem le tateumee bak ureung Acheh. Imeum Meunasah ngon Teungku Dayah (Teungku Rayek) umumjih meuphom cara bileueng urobuleuen nyo. Teuma lam hukom Islam, ngon bileueng (hisab) mantong hana sep, peureulee jak kalon buleuen (ru’yah). Adat jak kalon buleuen nyo umumjih na watee bak awai buleuen Puasa ngon akhee buleuen Puasa, keumeung tamong buleuen Uro Raya. Teungku Rayek biasajih nyan mat narit putoh (Meulayu: keputusan) lam bhah Puasa ngon Uro Raya nyo.
Bak nan-nan buleuen lam almanak Aceh that deuh roh Islam jih. Nan-nan buleuen almanak Aceh tabandeng ngon nan-nan buleuen almanak Islam nakeueh lagee nyo:
Sapha : Safar
Mo’lod : Rabi’ul Awal
Ba’da Mo’lod : Rabi’ul Akhir
Mo’lod Teungoh : Jumadil Awal
Mo’lod Akhe : Jumadil Akhir
Rajab : Rajab
Sya’ban : Sya’ban
Puasa : Ramadhan
Uro Raya : Syawal
Meu-apet : Dzulqa’idah
Haji : Dzulhijjah
Nan-nan buleuen lam almanak Aceh nyo mandum na sabab jih. Buleuen Muharram jeuet nan jih buleuen Hasan Husen nakeueh sabab peungaroh budaya Syi’ah lam adat Aceh. Dari kajian sejarah, ta tupeue Islam phon trok u Aceh bak masa Shahabat Nabi, dan mazhab nyan phon geupeuruno i Aceh nakeuh mazhab Syi’ah. Lam masalah nyo na dua kemungkinan dari pat trok Islam u Aceh, dan mandua na alasan logis jih. Kemungkinan phon nakeueh dari tanoh Persia, rot pengikot Sayyidina Hussein, cuco Nabi Muhammad SAW. Bukti nyo na bak model bate jeurat masa phon Islam nyan deueh gaya Persia. Kemungkinan keudua nakeueh dari Yaman (Hadramaut), rot pengikot Sayyidina Hussein chit, tapi nyan leubeh moderat daripada peungikot nyan na i tanoh Persia.
I tanoh Yaman nyo, ajaran Syi’ah jih rab hana beda ngon Sunni, sabab mazhab Syiah di sinan nakeueh Ja’fariyah ngon Zaidiyah. Lam mazhab Syi’ah buleuen Muharram nakeueh buleuen nyan peunteng, sabab bak buleuen nyan, Sayyidina Hussen, cuco Nabi Muhammad SAW, jipoh mate le teuntra Yazid, raja bak masa nyan. Kejadian nyan pah bak uro ‘Asyura, 10 Muharram. Teuma Sayyidina Hasan jiracon le Yazid. Nyan keueh asai buleuen Muharram bak almanak Aceh jeuet keue buleuen Hasan Husen.
Dua reutoh thon leubeh ajaran Syi’ah udep i Aceh. Lam masa nyan bacut-bacut trok gure-gure Islam nyan jak peuruno indatu ureung Aceh ngon ajaran Sunni mazhab Syafi’i. Bak watee nyan jalur trok Islam rot Yaman leubeh leumah, sabab di daerah Hadramaut nyan rame peungikot mazhab Syafi’i. Sementara meunyo lagee nyan umum jipeuruno bak ikula-ikula, bahwa Islam i Aceh nyan trok dari Gujarat, pasti mazhab nyan ta pakek le tanyo nakeueh mazhab Hanafi, kon mazhab Syafi’i.
Buleuen Mo’lod mandum na peuet buleuen. Meuranggajan lam peuet buleuen nyan, adat Aceh geupeuget
khanduri Mo’lod, keue geurayakan uro lahe Nabi Muhammad SAW, buleuen Mo’lod (Rabu’ul Awal) bak 12 urobuleuen. Umumjih watee khanduri Mo’lod nyo geupeupah ngon watee lheueh keumeukoh di blang.
Khanduri nyo saboh adat Aceh nyan jroh nibak Islam, saboh bentuk tapeumulia jame. Meunyo Nabi Muhammad Geujak bak rumoh sidro-dro sahabat, sahabat nyan geupeuteubit mandum makanan nyan na, geusi kameng, geupeuget ruti, geukhanduri keue Nabi ngon keue sahabat-sahabat laen nyan jak sajan. Meujan cit sahabat geujak undang Nabi u rumoh gobnyan jeuet geupeuget khanduri saboh kameng atawa dua. Le indatu ureung Aceh, sunnah khanduri nyo geupeulahe lam adat. Silaen khanduri Mo’lod, na cit khanduri buka puasa bak buleuen Puasa nyan geupeuadat, khanduri blang, khanduri gle, khanduri laot, dan macam-macam khanduri laen.
Khanduri nyo gadoh makna meunyo lam niet meubut jih kon sabab Allah ngon Nabi, dan nyo nyan ka mulai ta kalon lam masyarakat Aceh. Ladom khanduri meuleu-leu reubah leumo, meuleu-leu beulangong kuah. Nyo ka hana Islami le. Peureulee ta puwo teuma bak asai mula, mandum niet sabab
Islam ngon Allah Ta’ala.
Buleuen Puasa geukheuen meunan nakeueh sabab leubeh mangat kheuen jih bak lidah ureung Aceh dari kheuen Ramadhan. Umumjih dari buleuen Molod Akhe ka mulai geupeuget persiapan keue preh buleuen Puasa. Ureung meutani ka mulai geupula timon ngon kacang ijo keue cagruk buka puasa. Kayee dapu ka mulai geupesapat lam panteue. Kuru’an ka mulai geukalonkalon pat teupuduk jicong juree, bek hana meupat watee keumeung meudaruh tema. Bak buleuen Sya’ban, ureung-ureung inong geutop teupong bak jingki, mandum sago gampong teuleungo tak tuk jingki. Teuma ureung agam hana iem dro, geujak kalon leumo diglee toh nyan meuaso jeuet geusi keue makmeugang. Meunan cit meunasah geujak peugleh, geusai nibong keue aleue ngon papeuen keue binteh. Bah mangat bak seumayang teuraweh. Awak muda pih hana seungap, mulai jak kalon-kalon toh linto baro nyan hana tom leumah bak meunasah jeuet jijak pakat grop minsa.
Geukheuen buleuen Meuapet nakeueh sabab buleuen nyan meuapet bak dua buleuen uro raya, buleuen Uro Raya Puasa (Idul Fitri bak Syawal) ngon buleuen Haji (Idul Adha bak 10 Zulhijjah). Lam adat Aceh dua uro raya nyo sama rayeuk.
Teuma generasi lawet nyo ka leu nyan tuwo ngon almanak Aceh. Rot media nyo tanyo jeuet tamulai teuma tapuduk almanak Aceh nyan Islami, paleng han lam ate geutanyo.
(Sources: From various sources and personal conversation)
(Suhrawardi Ilyas, student at School of Physics, UNSW, Sydney,
Australia)
