Kamis, 29 April 2010
Mate Lampu
Karya : Mustafa Ibrahim Delima
Assalamualaikum warahmatuhu
Ranup sigapu peumameh haba
Keu bandum wareh barat ngon timu
Saleum lon tuju keu tanyoe dumna
Bacut na haba bak lon hai teungku
Keu mate lampu bacut ulon calitra
Neubaca beugot bek karu karu
Takot diteupeu le ureung lingka
Lazem takalon wahe e tungku
Malam di lampu jareung that nyala
Aleh pih pakon lagee nyan laku
Lampu hana hu geulap gulita
Ka seupot seupuet barat ngon timu
Ka han deuh ta eue sira saka
Ka han ta turi kupi ngon susu
Aweuk ngon syunu han le meubida
Nyang leupah seudeh oh watee ta eue
Ureung meukat bu salah keunira
Bak fotokopi pih laen lagu
Kahana laku ureung jak hana
Nyang meukat lilen leupah that gatu
Lagot meutabu ban lagot bada
Di aneuk muda pih leupah gatu
Di yub bak kulu meuseunda-seunda
Han soe kalon hana soe teupeu
Peu dipeulaku lam seupot buta
Peu di meuwawa peumeuwuwu
Wallahu a’lamu han so ek kira
Nyang leupah gura dan leupah lucu
Keu cut po bunsu roh meuhoi Apa
Saweub han leumah weub mate lampu
Watee geumeusu ka malee muka
